【明報專訊】一連3日喺會展舉行嘅健康博覽噚日開鑼，請咗平機會前主席周一嶽主持揭幕。冇見一排，周一嶽唔單止無殘到，講起頭髮仲自爆家族史，向護髮產品推銷員耍手擰頭。 話爸爸90幾歲頭髮喺度 唔擔心 周一嶽喺健康博覽行入會場時，有個護髮產品職員走出嚟向佢推介。周一嶽即刻摸摸自己啲頭髮，笑兩下就耍手擰頭行開咗。之後佢同Emily講，佢爸爸之前90幾歲時，啲頭髮都仲喺齊度，所以自己就唔太擔心呢方面嘅問題，唔使食護髮產品。 佢自己平時無食開保健產品，淨係靠良好嘅睡眠質素，同埋接近過度活躍程度嘅運動量嚟保持健康。家陣投身保險界嘅周一嶽，之前做過食物及衛生局長，到場仲都冇忘記局長嘅責任，提醒市民要按自己需要食保健食品，但唔好10幾款一齊食，唔係隨時會出現唔同反應，記得適可而止。 Emily仲問咗周一嶽有關立法會議員周浩鼎反同志嘅評論。佢話仲做緊平機會主席嗰陣，已經有同阿鼎講過平機會發言人係主席，唔係委員。如果委員想發表個人意見，而意見同平機會立場有異嘅話，佢嗰時已經講得好清楚，平機會主席會闡明立場同埋可能會譴責唔負責任嘅言論，所以在任時阿鼎都無成日出嚟講嘢。咁現任平機會主席陳章明處理成點？佢就話唔評論嘞。
|
| |
| |
;){kind=small}
