白韞六：領袖最緊要廉潔
[2014.07.19] 發表
【明報專訊】前廉政專員湯顯明捲入酬酢風波，損害廉署形象。現任專員白韞六(圖)噚日出席青年組織活動話，一個人唔廉潔，唔單止影響個人聲譽，仲會破壞機構形象，呼籲青年抵抗引誘。
不過，活動後佢急急腳走，無解釋先前講嘅話，係唔係指湯顯明破壞廉署形象，亦唔回應有關湯顯明同前特首曾蔭權涉貪案嘅調查進度。
活動上，白韞六話，一個領袖最重要特質就係廉潔，而廉潔包含各種道德原則，例如誠實、自律等，唔係淨係單單遵守法律。
佢仲即場用雅虎網站前行政總裁Scott Thompson做例子，話佢謊稱自己有電腦科學學位，誠信受到董事局質疑，最終辭職。白韞六話，Scott咁做，唔單止影響個人聲譽，仲破壞機構嘅形象。
更多港聞
相關新聞
