【明報專訊】香港近排邊個最紅？之唔係每日4點鐘都開記者會，講述警方點應付佔領行動、佔中點影響交通同救護服務嘅3名阿sir囉。facebook近排出現「四點鐘許Sir」、「梁Sir陪你談數據」、「李Sir馬路的事」3個專頁。其中，做過前特首曾蔭權副官、接待過前國家主席胡錦濤同英國前首相貝理雅嘅警察公共關係科(PPRB)總警司許鎮德嘅專頁最多人like，已經過萬。 網民仲封佢為「鎮德BB」，經常重複佢口頭禪「或者我再重申一次」，「I will now recap in English」，仲有人改咗卡通片《飛天少女豬事丁》首主題曲贈許sir，大唱「許sir許sir趣致的臉，我叫一聲即可開記招」。 許sir做過曾特首副官 3個阿sir受注目程度，分分鐘大過學生領袖同佔中三子，可能連警隊高層都估唔到。Emily聽講，今次「光明頂」行動嘅公關工作，已經由PPRB提升至一隊由高級助理警務處長趙慧賢領導嘅公關團隊負責，仲搵咗唔少以前做過PPRB或者較善於溝通嘅警察入去呢個「心戰室」，每日除咗「度橋」，仲要負責睇番網上好多警察處理佔中經過嘅短片，睇到眼都花。 工作咁辛苦，梗係要食好啲。Emily聽聞有九龍區麥當勞分店每日要整300個漢堡包運畀警方，雖然唔係好健康，但非常時期，唯有「食住先」。
|
| |
| |
;){kind=small}
;){kind=small}
;)
