【明報專訊】東華三院營辦嘅社區飯堂「膳深」下月啟用，東華主席何超蕸(Maisy)噚日就邀請政府新聞處長聶德權(Patrick)及一眾記者去試食。呢間食堂會為深水埗區內基層市民提供10元一餐嘅午餐、晚餐，Patrick致辭時就梁振英(CY)上身，講笑話有呢間咁好嘅飯堂，「土地好緊要」，因為土地先可以搞到，又大讚東華利用土地，提供呢個咁好嘅派飯「平台」。 有好飯堂 新聞處長：土地好緊要 「膳深」位於白田邨公屋地舖，而東華就用呢幅「土地」辦社企，整咗個大廚房及食堂，每日可以為基層及有需要長者提供250份膳食。呢間食堂嘅特色之一係招募咗區內長者同熱心人士，義務做廚師及服務員。Maisy就話「膳深」除咗為有需要人士解決溫飽，亦可以畀區內長者發揮所長，繼續貢獻社會。 東華噚日請Patrick及記者率先試食，包括一啲蔬菜、豆腐、魚塊等家常菜，大家都話味道唔錯。另外，東華今日(26日)會搞賣旗日籌款，Maisy話東華都追上潮流，搵咗人氣插畫師Plastic Thing幫手設計紙旗圖樣，大家今日喺街上見到人賣旗，可以支持吓。
|
| |
| |
;){kind=small}
;)
