【明報專訊】上星期剛滿65歲、可以拎長者卡嘅新民黨副主席田北辰，心境仲好年輕，鍾意周圍去旅行之餘，暑假仲帶埋兩個只得1歲嘅孫去玩，講玩當然唔係去公園咁簡單，田二少帶咗兩個孫去澳洲，包括去咗睇鱷魚。佢話孫仔唔驚之餘，仲坐喺鱷魚上面，真係初生之犢不畏虎，完全唔識驚。 壽星公偕孫遊澳洲 田二少噚日喺facebook上載同啲孫去旅行嘅相，佢話今年65歲生日，都畀兩個孫搶晒鏡，但佢覺得一家人，邊個搶風頭都無所謂。佢形容自己係「小生」，帶住兩個孫等一行人去澳洲探吓「鱷魚先生」，孫仔見到鱷魚先生一啲都唔驚，食住奶嘴淡淡定咁坐喺佢上面幫鱷魚搲背脊，田二少仲讚自己「虎公無犬孫」、夠膽識喎。 除咗鱷魚，田二少又帶啲孫去探「袋鼠小姐」，佢話其實生日喺邊、做過啲乜嘢都唔重要，最重要係一家人齊齊整整，咁先係最大嘅滿足。
|
| |
| |
;){kind=small}
;)
