【明報專訊】咩人最潮，梗係高官啦﹗Emily見過，我真係見過。自創新及科技局長楊偉雄早排出席創科論壇時爆出金句：「有邊個見過Steve Jobs？未呀？我見過！我真係見過﹗」即刻成為全城潮語。除咗藝人鄭中基及國際關係學者沈旭暉喺facebook「抽水」，連樂施會都抽埋一份，仲攞到無數「Like」。 樂施會前晚喺facebook上載3張印有「我見過！我真係見過﹗」嘅相片，全部係貧困地區村民生活照，每張有短文介紹，包括「有無人見過小朋友用頭運水？仲要唔係一個，係七個，未呀可？我見過，我真係見過！仲試過！真係好重㗎」；仲有「有無見過人要從地下挖泥水飲用？未呀可？喺埃塞俄比亞探訪村民時，我見過，我真係見過！」等。 其中，挖泥水相獲網友狂讚「靚抽」，更留言話要即時捐助機構，張相噚日已攞到千幾個「Like」，幾乎係平時10倍，連樂施會都喺回覆到整番個「#原來樂施會都識抽水」讚下自己。 不過，樂施會都係希望借「＃我見過我真係見過」系列，向網民分享尼泊爾山區及埃塞俄比亞村民苦况，同埋呼籲大家珍惜得來不易嘅清潔食水。大家分享張相時都要傳遞埋個信息呀﹗
|
| |
| |
;){kind=small}
;)
