迎春接福林村許願節新搞作
[2017.01.21] 發表
【明報專訊】農曆新年就快到，唔少人都鍾意去林村許願樹為新一年祈福。香港林村許願節2017將於1月28日至2月12日舉行，仲新增咗唔少活動，好啱一家大細去玩。首先有兩個大型吹氣城堡，其中一個係專為小朋友而設嘅城堡滑梯，另一款就叫做「鴻運吉山」，參加者可以攀爬到山頂敲大鐘，寓意來年萬事如意，兩款遊戲都要收錢，但主辦方話暫時未知定價。
一如以往，參與大年初一晚新春花車巡遊嘅花車，之後就會放喺林村許願廣場做展覽。許願節嘅籌委會召集人陳灶良話，想營造一個嘉年華嘅歡樂氣氛，現場仲有唔少美食攤位。佢仲話，今年仿真許願樹換咗新裝，換走咗舊嘅樹葉，再為棵樹裝新樹葉，煥然一新，樹冠都加大咗1.5米，已經準備好同市民一齊共度新歲。
更多港聞
相關新聞
