【明報專訊】上屆因醫委會草案拖累而拉倒嘅《私營骨灰安置所條例草案》，噚日再度闖關立法會。政府今次吸納咗好多議員修訂，本身做好萬全準備上立法會，點知天有不測之風雲，噚日遇上黑雨。原來食物及衛生局長高永文從瑞士日內瓦世衛大會返港，噚日朝早7點先落機，爭啲遇上東方航空衝出跑道嘅意外，好彩最後都準時趕到去立法會開會。 局長趕返嚟嘅努力無白費，黑雨警示喺大會11點開始咗半個鐘之後先掛上。主席梁君彥就話，因為議員們要留喺安全地方，所以會繼續開會，總算有驚無險。不過Emily就見到高永文面色麻麻，唔知係咪未適應到時差呢。 高局長避得過黑雨，避唔過議員「拉布」，仲要係因為特首梁振英UGL單嘢無辜中招。事關民建聯黃定光借骨灰龕條例出氣，要求記名表決拖延審議時間，希望令泛民彈劾CY嘅動議可以遲啲先搞。佢呢個奇招都令班官員失咗預算，不過有議員相信，呢條例今個禮拜預計都可以通過到嘅。
|
| |
| |
;)
