戒凍檸茶3月 譚文豪腰減兩吋
[2017.11.25] 發表
【明報專訊】立法會財委會噚日討論為食衛局開設職位，提到「降低食物中鹽和糖委員會」嘅工作，公民黨譚文豪話就用自身經歷去發言，佢話好關注食物糖分，形容自己身歷其境，因為自己過去3個月唔飲凍檸茶、食少啲高糖食物，條腰已經減咗兩吋，佢話罐裝同紙包飲品含糖量高，飲兩罐或兩盒已經會「爆表」。
當局現時有低糖食物標籤計劃，譚文豪就要求當局同時制訂強制高糖食物標籤，令生產商唔會製造太多高糖產品，相信咁樣做會有利消費者健康。譚文豪喺會外向Emily展示自己修腰成果，佢話以前著唔落嘅恤衫，𠵱家修腰後著得返，而腰圍減咗亦要剪短皮帶。佢話戒凍檸茶嘅原因，係食肆冲嘅凍檸茶糖分好高，自己即使飲都要叫走甜。
食衛局副秘書長(食物)馮建業會上回應話，法例無定義高糖，所以搞高糖食物標籤有技術困難，但承諾當低糖標籤計劃做得好，當局會睇下有無空間向消費者提供更多資訊。
更多港聞
相關新聞
