【明報專訊】政府力銷參與粵港澳大灣區規劃，之前立法會嘅經濟、財經同工商3個事務委員會打算4月組團去大灣區城市作職務訪問，噚日資訊科技及廣播事務委員會開會，主席莫乃光話佢哋個委員會都加入，行程會參觀同創新科技相關嘅單位及企業，希望用委員會嘅名義，一齊參與聯席職務訪問。 在席嘅委員對考察都無異議，而香港本土毛孟靜就擔心有議員冇回鄉證點返內地，莫乃光就話可以透過秘書處向中旅社申請。毛孟靜強調，佢唔會參加個考察團，因為覺得整個大灣區計劃係將香港大陸化嘅行為。 另外，會上又討論加強本港資訊保安，金融界議員陳振英關注，政府推出嘅5億元科技券計劃，為每間中小企提供最多20萬元資助係咪足夠。副政府資訊科技總監林偉喬話，截至1月底，已批出科技券畀16間公司推行加強網絡保安工作，政府會以2比1嘅配對方式為中小企提供資助，企業出10萬元，政府資助20萬元，相信都可以做到幾多嘢。
|
| |
| |
;)
