沙灘走塑由餐具開始 黃錦星紙飲管飲椰青

沙灘走塑由餐具開始黃錦星紙飲管飲椰青

[2018.07.20] 發表

【明報專訊】環保最重要一環係源頭減廢，好似出外用膳，唔經唔覺就好易用咗好多塑膠餐具，環境局長黃錦星噚日出席「走塑沙灘　餐具先行」啟動禮，佢話全球都好關注海洋廢物，特別係塑膠，各地都有唔同方法做自願「走塑」，而政府嚟緊就會喺康文署轄下沙灘，聯同相關小食亭、快餐店同沙灘附近嘅餐廳，喺運作上避免即棄塑膠，例如膠飲管，同埋減少即棄塑膠餐具，希望一齊加強沙灘教育宣傳。

研政府飯堂源頭減塑

今次運動會涵蓋全港所有公眾泳灘嘅小食、快餐亭同餐廳，𠵱家泳灘附近總共有47間餐廳食肆、小食亭參與，運動期間會盡量避免使用或派發膠飲管、即棄塑膠餐具，喺沙灘實行源頭「走塑」；又會試行使用較環保餐具，好似紙飲管、竹籤、紙袋或可重用餐具，代替即棄塑膠餐具。

黃錦星話，政府亦會有幾部曲，下一步會研究在政府物業內嘅飯堂加強推動從源頭減少即棄塑膠，再下一步就係喺政府場地租畀唔同承辦商營運嘅餐廳做進一步推廣。佢話政府會做研究，參考國際間行動同因應本地情况，睇吓點樣喺法規同管制上，應對「走塑」行動。

黃錦星事後喺facebook上載幾張活動相片，相中見佢飲椰青，而佢hashtag就特別註明「椰青配紙飲管」，又話好耐無用飲管。