陳勇：白鴿黨勾結外面黑力量 卿姐：同國際聯繫 理所當然無問題

陳勇：白鴿黨勾結外面黑力量卿姐：同國際聯繫理所當然無問題

[2018.12.22] 發表

【明報專訊】民主黨前主席劉慧卿近期出山，擔任黨內新設嘅國際事務委員會主席，希望同外國建立恆常聯繫。建制派對呢類對外交流一直不抱好感，港區人大代表、民建聯副主席陳勇噚日就形容，民主黨引入外力等於「不肖子孫到外面勾結黑力量」、「引入外國力量綁架屋企人」，認為香港內部事務應該自己解決；卿姐就隔空反駁，強調香港同國際聯繫係理所當然，並非「唱衰香港」，舉例特區政府都要去外國介紹本地情况咁話。

陳勇噚日接受商台訪問時形容，香港係國際城市，同任何人溝通或反映意見都無問題，但從道義層面睇，即使香港有事處理得唔妥當，都應該內部自己解決，唔應該要求外國干預香港政治或呼籲制裁，否則等如「不肖子孫唔喺屋企開家庭會議解決問題，而去外面勾結黑力量嚟恐嚇自己家人」。陳勇話，政治爭拗最好自己解決，咁樣更符合各方利益，亦更易達成共識。

政府都要去外國介紹本地情况

一向敢言嘅卿姐當然唔會捱打，佢接受訪問時隔空回應陳勇，強調香港同國際聯繫係無問題兼且理所當然，而且香港簽署咗好多國際人權條約，須定期向聯合國匯報，港府月前亦派人去聯合國講解香港情况，「佢哋自己都要跑去外國傾」。

卿姐另外接受港台訪問時就話，該黨嘅國際事務委員會會着重喺本地同外國領事聯繫，外訪工作對委員會而言「唔太急」。