【Emily】楊潤雄考AO要take2
[2019.07.22] 發表
【明報專訊】青年對前路嘅困惑，年少時嘅教育局長楊潤雄都經歷過，佢話入大學時無乜方向，於是揀咗讀社會科學，畢業後見政府請政務官(AO)，就試吓投考，但連面試機會都無，輾轉投身會計界7年後，再試考AO，今次終於獲取錄。
楊潤雄接受馬會《駿步人生》訪問，分享成長故事。佢話細個時口多多，成日畀訓導主任訓示，罰打手板、被記過，但同時又好勤力讀書，老師都對佢又愛又恨。
第一次連面試機會都無
楊潤雄讀屋邨小學，雖然唔係年年考第一，但都算成績標青，中學考入九龍華仁書院。升大學時，佢無揀到父母想佢讀嘅醫科，又因無乜方向，揀咗一條感覺上「闊一啲」嘅路，入讀港大社會科學。1985年，楊潤雄大學畢業，當時試過投考AO，但連面試機會都無，之後喺會計界打滾7年，喺澳洲一間中型工廠做會計，剛好遇上政府喺澳洲招聘AO，今次終於成功。
今年56歲嘅楊潤雄，喺政府做過唔同崗位，佢話最鍾意做民政專員，因為可以直接感受市民需要，好似SARS期間，搞地區清潔工作，見證一條街由污糟到乾淨。佢之前做教育局副局長，兩年前成為局長，成日都觸及敏感議題，四面受壓，佢話接受挑戰，會調節心態，再忙都堅持一星期做一次運動。
更多港聞
【明報專訊】前財政司長曾俊華噚日喺灣仔書展出席新書《重劍2.5》嘅發佈會，新書其中一個重點係「面對挫折，走向成功」。會唔會將呢本書，推薦畀最...
詳情
相關新聞
