【Emily】器官捐贈者丈夫：無法留住太太生命，但可以令佢嘅生命變得有意義……
[2019.08.26] 發表
【明報專訊】捐贈器官除咗令病人受惠，亦可以令已離世捐贈者遺愛人間。政府新聞處噚日發布短片，講述一名患有腎衰竭嘅女士因為獲得器官捐贈重獲新生，該女士話好多謝器官捐贈者同家屬令佢脫離病苦，仲話捐贈者𠵱家喺身邊，成為佢嘅天使。
受惠病人感恩 如有守護天使
21年前確診腎衰竭嘅郭女士，喺得到有心人遺贈前，每星期都要經歷兩次血液透析治療(洗血)，佢形容嗰段經歷令佢痛不欲生，「我洗血係為咗生存，抑或我生存係為咗返醫院洗血呢？」到2014年，佢等到合適嘅器官接受換腎手術，佢好感激捐贈者同家屬，話想同佢哋講「雖然你嘅家人已經唔喺你哋身邊，但佢嘅器官嚟咗我身邊，仲成為我嘅天使」。
有人受惠，亦有人選擇奉獻。劉先生嘅太太去年因急病離世，雖然冇喺器官捐贈登記名冊登記，但劉先生都尊重太太生前表達嘅意願，同意捐出太太嘅腎臟。佢話嗰一刻雖然冇辦法留住太太嘅生命，但可以令佢嘅生命變得有意義。
衛生署中央健康教育組醫生高月晶話，負責移植嘅醫療團隊會評估捐贈者嘅情况，睇吓邊啲器官適合捐贈。即使一般癌症病患者去世後不宜捐出器官，但都可捐贈眼角膜。
更多港聞
【Emily】與智能燈柱公司合作 中大課程刪帖
【明報專訊】前日觀塘反修例遊行其中一個「目標」係區內嘅智慧燈柱，政府早前多次澄清話燈柱唔會有人面辨識功能，亦唔會侵犯私隱，但平息唔到猜疑。f... 詳情
相關新聞
