【Emily】國泰空服員工會未夠人「接莊」
[2023.04.08] 發表
【明報專訊】國泰航空公司空中服務員工會新一屆理事會選舉提名期上月底結束，工會日前喺facebook話未收到任何人報名，決定將提名期延長至今個月20日。工會外務副主席蕭詠恩噚日話延期並唔罕見，現屆理事會曾因未達最少7人門檻而延遲上任。據工會了解，有同事密鑼緊鼓「組莊」，不過暫時只有3至4人，故決定延期，等有興趣嘅同事有更充裕時間。
蕭詠恩分享，做咗一年半工會代表，適逢新冠疫情期間未復航，所以唔太辛苦，但佢認為公司無以前咁開放，唔願意溝通，加上大氣候下工會生存較困難，惟相信「一息尚存」，希望堅守工會核心價值，為同事爭取更理想嘅工作環境。佢話如果大公司對員工好，樂意老懷安慰地做「社畜」，可惜𠵱家公司對員工苛刻，更加突顯工會嘅重要。
工會今年初申請喺國泰城範圍集會不果，其後發動「按章工作」，要求資方正視人手不足同編更安排問題。對於有會員認為工會爭取唔到乜嘢，蕭話永遠無法預測成果，就算爭取唔到，唔代表唔需要爭取，日後有爭取空間時，如果無咗工會幫手就太可惜。
更多港聞
【Emily】日總領事嘗雞蛋仔 「要唔要食一粒？」
【明報專訊】唔少外國駐港領事嚟到香港都鍾意品嘗地道小食，日本駐港總領事岡田健一之前試食過蛋撻，仲試齊牛油皮同酥皮兩款，今次佢就食自己好鍾意嘅... 詳情
【Emily】澳門工展會試用吸塵機 丘應樺話包辦家務
【明報專訊】香港同澳門全面通關後，廠商會今年再次去澳門搞工展會，一連4日嘅活動噚日開幕，商務及經濟發展局長丘應樺都有「過大海」主禮，仲即場試... 詳情
相關新聞
