【Emily】迪士尼聖誕新美食 美酒佳餚搶先登場
[2025.10.07] 發表
【明報專訊】旅發局嘅「香港美酒佳餚巡禮2025」月底喺中環海濱舉辦。旅發局介紹場內嘅「香港迪士尼主題專區」，提及將會有多款從未喺主題樂園出現過嘅全新聖誕主題美食，會喺美酒佳餚巡禮內率先登場，例如以聖誕同米奇為主題製作嘅「節日小食拼盤」、中西合璧嘅創意點心「米奇原隻鮑魚雞粒撻」等。各款主題美食需要3至4張「品味券」，購買之後亦可享有酒類優惠。專區都首次引入華特迪士尼家族生產嘅紅白酒。其他飲品仲包括漫威主題雞尾酒，亦有靈感源自《怪誕城之夜》嘅「血包」飲品，其實係果味酸甜特飲，以呼應月底嘅萬聖夜。
美酒佳餚巡禮門票為40元一位，仲額外發售預購優惠價268至498元嘅「品味證」同「尊尚品酒證」，分別包括8至16張「品味券」等。
更多港聞
【明報專訊】噚日係中秋佳節，大家都祈求人月兩團圓，但如果可以捧走8000萬元橫財就更加圓滿！頭獎基金估計高達8000萬元嘅六合彩中秋金多寶攪...
詳情
相關新聞
