【明報專訊】政府上年3月委託港大學者周永新做嘅退休保障研究，等咗差不多一年半，終於喺今日能夠公之於世。香港總商會總裁袁莎妮噚日召開記者會，率先講吓商會點睇退保問題；佢話好認同香港貧富懸殊問題嚴重，出街都見有老人家要彎低身執紙皮，所以都會行埋去，畀100蚊個老人家幫補吓，但就認為退保唔應該「人人都畀」，要將資源聚焦去幫最有需要嘅長者。 袁總幾多歲？ 65減20？ 據知今次報告提及嘅退保方案，有4個建議都涉及僱主、僱員同政府嘅三方供款，所以作為總商會總裁嘅袁莎妮都好關心呢個議題。袁喺席間透露自己「年齡嘅秘密」，話如果他日方案拍板，凡65歲或以上長者都拎到每月3000蚊的話，自己喺20年後、即係2034年就攞到錢，咁總裁即係幾多歲呢，65減20？
|
| |
| |
;)
