【明報專訊】行政會議成員羅范椒芬近日言論都好惹火，繼話人民力量陳偉業(大嚿)阻住創新及科技局係「傷害無辜者，天誅地滅」後，噚日繼續不點名咁撩大嚿，以恐怖組織伊斯蘭國斬人頭事件形容「拉布」。大嚿聞言好嬲，話感到被侮辱，反諷羅太可能患上「妄想症」。 羅太噚日朝接受商台節目訪問，講起創科局撥款喺立法會財委會觸礁，表示心痛。羅太話佢之前已經禮賢下士，求見泛民議員傾偈，但對方唔睬，而佢只好逐一發短訊游說。佢解釋對大嚿惡言相向，係因為「人不犯我，我不犯人，當人犯我時，我又不甘示弱咁解嘅啫」。 羅太話自己以前喺政府內已經「示弱」咗好耐，?家唔使忍，佢又點名讚社民連議員梁國雄，收到短訊後回覆有禮貌，所以佢無惡言相向，但大嚿回覆「有你們管治，香港必定沉淪」。 葉劉：呢個形容詞過分 羅太講吓講吓，仲忍唔住話，「你傷害無辜呀，即係等於?家嗰啲……咩咩咩伊斯蘭嗰啲，我有陣時睇到都真係好心痛，點解無端端捉啲人、隨街捉咗人去斬頭」。 大嚿再次聽到羅太批評，回應傳媒時就話，羅太以伊斯蘭國形容「拉布」，係缺乏處理政治事件基本技巧，又話自己係基督徒，對於被比喻為伊斯蘭國感到侮辱。大嚿仲懷疑羅太缺乏常識，有「妄想症」。 同為行會成員嘅新民黨主席葉劉淑儀，聽到羅太嘅比喻都話「呢個形容詞過分」，因為拉布都係和平手段，唔應該同恐怖組織相提並論。
|
| |
| |
;)
