【明報專訊】即將退休嘅警務處長曾偉雄噚日出席東區區議會會議。多個建制派區議員都撐警方買水炮車，身兼立法會議員嘅鍾樹根話極力撐警方，「(催淚)煙又唔鍾意，咪畀啲水佢囉！」佢話水炮車「必不可少」，又建議警方買國產水炮車，只需500萬一部，「又平又靚又快趣」，而向外國買水炮車交貨時間較長，「我驚佢哋(示威者)享受唔到呢啲待遇唔係幾好」。 身兼全國人大嘅區議員蔡素玉話，福建鄉親一致支持買水炮車。區議員馮翠屏就話，買水炮車係「遲來的春天」。區議員羅榮焜就「譴責」警方買水炮車買得太遲，又話「平生不作虧心事」，如果無做錯事，根本唔使驚水炮車。區議員勞鍱珍就話，街坊對警方買水炮車「拍手支持」。 東區區議會限記者入場 Emily噚日採訪東區區議會，早到20分鐘都唔畀入，職員話得10個位畀記者，其他記者要企門口，幾經爭取先放行。Emily採訪過其他區議會，都無咁嘅限制，其實區議會係公開會議，真係唔明點解要搞限制。
|
| |
| |
;)
