【明報專訊】立法會主席曾鈺成經常寫文論政，唔少人都覺得佢嘅文章有啲諷刺特首梁振英(CY)；外界就一直覺得兩人不和。曾主席接受電台專訪時就否認同CY不和，仲形容同佢關係「相當好」，只係有人挑撥離間：「『剝花生』嘅人當然覺得你們有交嗌就過癮。」 獲CY介紹馬爾代夫酒店 曾主席強調同CY關係相當好，仲舉例話啱啱去馬爾代夫度假嘅酒店，都係CY介紹。佢話自己「寫文章要言之有物，有啲人講我暗喻乜，就等佢哋各人演繹，無問題」。 「文章暗喻乜 等各人演繹」 曾主席接受DBC數碼電台專訪，講到佢嘅智庫，表明唔介意如果CY競逐連任特首時，喺政綱中加入佢智庫嘅研究結果。佢又話，智庫已經籌到超過1000萬，可以運作最少兩年，即係去到後年嘅特首選舉。 智庫籌款逾千萬 捐款者建制為主 籌到咁多錢，相信唔少泛民團體都好羨慕，曾主席話捐款者主要係傳統建制派，或傳統愛國愛港人士；同時亦有啲商界人士。佢話收到唔少人應徵做智庫職員，有啲係外國回流嘅，亦有部分係現任大學或其他智庫嘅研究員。曾主席話初步有十個八個適合人選。
|
| |
| |
;)
