【明報專訊】宇宙最強打工仔、亞視執董葉家寶今日再就亞視欠薪案上庭，結果難料。佢喺亞視「存亡之秋」時堅持唔「跳船」，贏得員工尊重，亞視公關及宣傳科高級經理黃守東發起聯署力撐家寶，近300員工響應，而超過10名亞視或亞視出身嘅藝人、前藝人會親到法庭以示支持，包括黎燕珊、魏秋樺、張立基、袁潔儀、宮雪花等等。 而聯署信內容提及，亞視股東同投資者舊年突然停止注資，令亞視面對開台以來最大危機，多次無糧出，更經歷股東糾紛、無錢交牌費，甚至唔夠資金維持廣播等，樣樣都足以令亞視「垮台」；但家寶「未有於此危局中棄我們以及亞視而去」，堅守責任、有承擔，帶領員工「迎難而上」，保住亞視一線生機，亦令同事不致失業。 信中又話，家寶明明打份工，因為係執行董事而被控，但佢無顧念自身，繼續四出奔走，「盡百分之一百的努力，力求讓亞視準時發薪」。如果冇咗家寶，亞視睇怕已經無力運作，「不可能迎來現今新投資者入主……迎來光明的發展前景」。員工話「路遙知馬力，日久見人心」，表明無限量支持家寶。
|
| |
| |
;)
