馬會免費資助 1.6萬小一生學游水救命
[2016.02.05] 發表
【明報專訊】有人話生意淡薄，不如賭博，但馬會行政總裁應家柏(小圖)就唱反調，話受經濟下行影響，預計今年賽馬投注額或會減少3％至5％，不過佢強調馬會將繼續回應社會需要，唔會影響到慈善捐款額。佢哋今年夏季會推出一個免費教1.6萬小一生學游水嘅項目，目標係教學童至少游到20米嘅「救命」距離。
馬會慈善及社區事務執行總監張亮同Emily講，未來3至5年馬會重點推動青年、長者及體育3個範疇嘅社區項目，其中今年夏天與游泳總會合作，資助全港約一半小一學生，即約1.6萬人學游水，詳情4月再公布。
點解教一半小一生游水？張亮解釋，據統計本港約一半人唔識游水，澳洲識游水嘅人高達85％，而觸發全民學游水嘅意念，係同2012年南丫海難有關。呢個項目估計要花逾千萬元，但張亮話唔係有錢就可以解決問題，好似要安排咁多細路學游水，要搵到泳池、配對到足夠教練，又要夾學生放假，所以同泳總及康文署研究咗幾個月。
「世界慈善指數」馬會第六 亞洲紀錄
去年馬會投注額創新高，連帶喺2014/15年度撥出做慈善嘅款額都達到38.7億元。應家柏話據倫敦財經報章City A.M.發布嘅「世界慈善指數2015」，馬會位列第六位，係首次有亞洲公益機構晉身前10名。排首位嘅係蓋茨兩夫婦嘅基金會。
更多港聞
【明報專訊】民建聯立法會議員葉國謙將退下火線，該黨中委會早前通過設立機制搞黨內初選搵人接任，黨內區議員一人一票選出代表出戰，實行「真．民主」...
詳情
【明報專訊】今日係年廿七喇，解放軍駐港部隊司令員譚本宏中將及政治委員岳世鑫中將，噚日發出新年賀辭，祝市民新年快樂！軍隊嘅信函，結尾署名前，係...
詳情
相關新聞
