【明報專訊】被形容為「好打得」嘅政務司長林鄭月娥，公開場合好少談及私事或感情事，商台噚日播出林太嘅訪問，佢就罕有地提及愛情史，原來林鄭同老公係喺英國一間醫院結緣。 林太話，當年做AO時獲保送去英國劍橋進修，但有一次踩單車時遇上車禍，腳骨折斷，需要住院休養1個月，呢個時候佢丈夫就同幾個當地香港留學生去醫院探佢，兩人就係咁樣認識，兩三年後對方回流香港就同佢結婚。林太話當年係靠電報同寫信維繫異地戀。 林太形容老公生活同性格簡單，佢都甚少同外界提起對方，司局長中只有幾個人見過佢老公。佢坦言做咗司長後，老公唔喺身邊，間中都會覺得孤獨；而過去數年最開心就係2012年農曆新年放假去英國同探仔。 《前程錦繡》送香港 「仍是福地」 林太喺訪問中，揀咗已故歌手羅文名曲《前程錦繡》送畀香港，強調「香港仍然係一個福地」，佢話有專業界朋友認為香港好亂、好負面，但佢覺得環顧全世界唔係好多地方係樂地，「香港仍然係一個福地」，佢寄語大家遇挫折時唔好擔心，認為唔可以畀唔開心嘅情緒持續。
|
| |
| |
;)
