【明報專訊】郵輪旅遊愈嚟愈多噱頭，「皇家加勒比國際遊輪」第三年以香港為母港，7月起同本地旅行社合作推出多款主題郵輪團，例如越南團分別請咗盧冠廷、達明一派同李幸倪上船開音樂會，4月前訂位，未連稅前最低團費2520至3720元。 李居明上船講運程 中旅獨家發售嘅兩晚體驗團就有「家燕媽媽」薛家燕，或美麗華旅遊主辦、玄學家李居明做嘉賓嘅《開運王潮爆在郵輪》，將電台節目搬上船，齊齊講運程。呢兩個團未連稅前團費約800蚊。 皇家加勒比華南及香港區銷售及市場總監楊博雄話，多元化新產品瞄準老中青三代客群，希望帶動郵輪旅遊市場，甚至改變港人去旅行等到最後一刻先報名嘅習慣。距離今季首航仲有3個幾月，暫時預訂率約三成。佢話以往日本郵輪團獨贏，暫時見到今季越南團急起直追，得益於船公司可代辦簽證，6美金搞掂，平好多，仲唔使自己去領事館申請。 今年6月至11月，皇家加勒比旗下嘅海洋航行者號同海洋贊禮號共22團喺香港出發，繞經越南、沖繩同台灣等，另有9團喺深圳出發，送接駁香港、深圳碼頭嘅船飛。
|
| |
| |
;)
