【明報專訊】掌上壓唔易做，大家又有無試過單手掌上壓？警務處聯同保護遺棄動物協會(簡稱SAA)下月展開為期10星期嘅單手掌上壓挑戰，幫協會籌款。參加嘅市民只要完成唔少於3下單手掌上壓，拍片上載去facebook，再捐唔少於128元俾SAA就得，仲可以喺facebook tag唔少於3個朋友接受呢個挑戰，做法同之前嘅冰桶挑戰相若。 感受肢體殘缺動物情况 SAA創辦人陳淑娟話，部分人因為寵物患病或殘障就放棄照顧，協會照顧部分嘅狗仔得3隻腳，多數係遇上車禍，希望今次籌款幫到受傷嘅動物。Emily聽講，主辦單位希望市民透過缺少一肢嘅情况下做掌上壓，感受肢體殘缺動物情况，宣傳愛護動物信息。 呢個單手掌上壓挑戰喺下星期日(28日)喺赤柱廣場露天廣場舉行啟動禮，暫定4月7號舉行嘅閉幕禮希望會有至少250人一齊做單手掌上壓，仲諗住叫埋反恐特勤隊同機場特警人員一齊參與，刷新健力士世界紀錄。Emily聽聞，活動會邀請運動員同明星參加，推動保護動物信息。 閉幕禮擬250人同做單手掌上壓 警隊2011年10月推出動物守護計劃。警方喺2014至2017年依次分別處理77宗、58宗、69宗同80宗殘酷對待動物案件，分別有33、17、28同45人被捕。警務處支援科警司(策劃行動)鄭威鍵話，近年唔少市民主動舉報，警方查案有時候遇到困難，例如部分案發地點無閉路電視。
|
| |
| |
;){kind=small}
;)
