【明報專訊】平時鍾意做facebook live嘅建制派議員何君堯，日前喺立法會一地兩檢條例草案委員會會議期間，都不忘做live直擊會議情况，仲向投訴佢嘅泛民議員做手勢扮鬼臉，引起批評；噚日佢喺立法會走廊遇到民主黨林卓廷，阿廷就窒何君堯呢期好紅，嗰幅扮鬼臉嘅圖好「經典」。何君堯聽完笑住反駁，話自己同林卓廷係歡喜冤家，大家鍾意「質來質去」。 兩個人上年11月曾經一齊代表立法會去英國外訪，阿廷噚日就話「好懷念同佢喺英國嘅日子，唔使同佢講嘢」，又諷刺何君堯「真係相當有戲劇細胞，應該讀戲劇系」。點知呢個時候執業律師何君堯回敬，話自己「一早已經係戲劇系同農務系畢業㗎啦」，講完仲用手拍咗阿廷一下，之後走咗去，林卓廷就無奈反問咩叫做「農務系」。 林嫌鬼臉old school 「囡囡都唔做」 林卓廷話，當日見到何君堯喺會議室舉起個「6字」嘅手勢扮鬼臉，佢都呆咗。阿廷話呢個手勢加埋鬼臉好「old school」，係有「吹咩」嘅意思，連五年級嘅囡囡都話唔會做啲咁嘅行為。
|
| |
| |
;){kind=small}
;)
