【明報專訊】台灣總統大選今個星期六(11號)舉行，唔少政黨人士都會飛去寶島觀選，有案件在身、未能出境嘅香港眾志秘書長黃之鋒就拍片越洋呼籲台灣人，特別係當地嘅年輕人，當日記得回家投票，用手上一票捍衛民主。 過去半年嘅反逃犯條例修訂運動，令香港同台灣喺政治議題上緊密交流，兩地民間團體亦加強合作。黃之鋒拍片用普通話感謝台灣嘅朋友，話多謝所有支持香港民主運動嘅台灣人。佢又話，了解到台灣政府、執政黨同民間團體喺「反送中運動」中協助前赴當地嘅港人，令佢非常感動。 黃之鋒話，之前去台灣時講過希望「今日台灣，明日香港」，希望香港人可以好似台灣一樣選自己嘅政府，「我哋希望台灣嘅朋友可以捍衛民主」，呼籲台灣人特別係年輕人，記得回家投票，用選票捍衛台灣民主。
|
| |
| |
;)
