【Emily】啟德空中花園開放 夜間點燈如舊機場
[2021.05.22] 發表
【明報專訊】全長1.4公里嘅啟德空中花園噚日正式開放，市民又有消閒好去處。負責工程嘅土木工程拓展署話，啟德空中花園係全港首個建於波浪形隔音屏障上嘅空中花園，以航空為設計主題，夜間照明效果猶如機場跑道兩旁嘅燈光，營造昔日機場氣氛。
全長1.4公里 分春夏秋冬4區
土拓署又話，空中花園種有超過80種樹木同灌木，園景廊劃分春、夏、秋、冬區域，展現四季不同色彩，係啟德發展區嶄新地標，北面連接未來嘅都會公園，南面接駁啟德郵輪碼頭、啟德跑道公園，以及前啟德機場跑道兩旁嘅海濱長廊。
空中花園內設3個架空廣場，分別為「花園廣場」、「草地廣場」及「噴泉廣場」，各具特色；由噚日開始至11月30日，市民可透過「期間限定」嘅三維擴增實境手機應用程式喺空中花園嘅「打卡位」拍攝有趣照片，其中一款係有飛機喺頭頂飛過，營造驚險效果。
有關「啟德空中花園」嘅資料同前往方法，可瀏覽網站 www.skygarden1331.hk。
更多港聞
相關新聞
