【明報專訊】政界傳聞特首梁振英要班官員齊齊杯葛月底嘅民主黨20周年黨慶，民主黨晚宴籌委會主席李華明(Fred)噚日喺電台節目被主持問到呢個問題時，忍唔住發火，話政府咁做係「細路仔玩泥沙」，亦係同民主黨「開戰」，雙方關係難免進一步陷入低潮。 Fred又點名提及上次有出席嘅政務司長林鄭月娥，「以前你又嚟？畀面派對嚟㗎嘛……做政治嘅嘢，你有活動我咪去撐你場……?家擺明係同政改(有關)，(政府)話要拉票，但做同講係相反」。 上次黨慶李華明都係籌委會主席，當時有64個官員出席酒會，包括林鄭同財政司長曾俊華，今年安排冇變，食衛局長高永文同運房局長張炳良本來答應出席酒會，「?家要做啲應對，本來預咗好多人招呼……?家成盆冷水淋落嚟，我咪化悲憤為動力，睇吓最後有幾多人出席捐錢」。 李華明又喺節目形容民主黨「坎坷」，話經歷佔領行動後，民主黨好難再堅守和平非暴力原則，更指溫和泛民派生存空間收窄，「心溫和但唔敢講，因為怕被網上狙擊」。 佢歸咎佔領行動失敗原因係年輕人「係咁衝」，「年輕人揸fit咩？世界要老中青混埋一齊」。
|
| |
| |
