葛珮帆轟「籠裏雞」范國威 斥亂畀學生入議辦遞信

葛珮帆轟「籠裏雞」范國威
斥亂畀學生入議辦遞信

[2015.06.11] 發表

【明報專訊】由中大學生組成、關注政改嘅組織「中大諗」下周一舉辦政改論壇，希望邀請3個身兼中大校董嘅立法會議員范國威、葛珮帆(EQ)同張宇人出席，組織噚日去到立法會希望遞信畀3人，但最後只得范國威現身接信，范接完信就帶住6、7個學生，直闖另外兩個議員喺立法會嘅辦事處，激到民建聯紮紮跳，表明強烈譴責同會向行管會投訴。

EQ：一個女職員畀幾個男人圍

EQ話噚日朝大約10點45分，范國威帶同幾個中大學生「衝入」佢辦事處，要求交信畀佢，當時只有一名女職員喺度，幾個男人圍住佢，而黨友鍾樹根同何俊賢知道後立即到場聲援，據聞仲有幾句口角。

鍾樹根批評范國威行為可恥，話大家關注立法會保安安排，但今次竟然係「籠裏雞」帶人去唔同樓層，與身分不符。佢話女同事未受訓練，幾個男人咁樣入辦事處好危險喎。何俊賢質疑，今次可以帶人隨便去其他議員樓層遞信，下次係咪可以帶汽油彈？

范：無濫用職權學生有禮貌

但范國威強調自己無濫用職權，反指民建聯誇張，強調學生係好斯文、有禮貌咁遞信，佢覺得自己作為議員，可以亦應該盡職能對有關學生提供方便。咁下次本土派想向建制派表達意見，佢又會唔會帶對方走去建制派辦公室呢？范話自己會逐個個案睇。

身兼中大校董嘅張宇人就無咁大反應，但批評范國威呢個舉措「離晒譜」，強調學生上星期已電郵信件畀佢，佢諗緊點覆，根本唔需要再遞信，否則就係做戲，「我張宇人幾十歲人，無興趣做戲或做人哋嘅戲！」佢仲做護花使者，叫人下次就唔好搞EQ，「叫佢哋搵我，咪睇佢哋有幾多人」。

「中大諗」成員喺網上表示，佢哋噚日遞信，其間並無示威行為。