【明報專訊】瑞士時間星期三晚，劉鑾雄(大劉)喺蘇富比拍賣會用3.7億港元天價投得12.03卡拉內部無瑕鮮彩藍鑽，仲即刻命名做「The Blue Moon of Josephine」。大劉透過發言人證實，藍鑽係送畀佢同女友甘比(陳凱韻)所生嘅囡囡劉秀樺。藍鑽原名「藍月」，今次成交價打破鑽石世界拍賣紀錄，對上一粒世界最貴鑽石係24.78卡拉「格拉芙粉紅鑽」，2010年成交價3.6億港元。 成交價破鑽石拍賣紀錄 今次唔係劉秀樺第一次收大禮，大劉前一日先喺佳士得拍賣會用2.2億港元投得罕見16.08卡枕形鮮彩粉紅鑽，命名「Sweet Josephine」；2009年亦都曾經用7400萬港元投得7.03卡彩藍鑽石「Star of Josephine」。 唔知係咪驚大家唔記得，大劉發言人特別補充，舊年11月大劉都買過兩粒巨鑽送畀呂麗君嘅囡囡劉秀盈，分別係價值6508萬港元嘅10.1卡拉天然紅寶石「Zoe Red」，同埋價值2.54億港元、9.75卡拉鮮彩藍鑽「The Zoe Diamond」。呢粒藍鑽當時都刷新鑽石卡拉單位價世界拍賣紀錄。
|
| |
| |
;){kind=small}
