【明報專訊】區選塵埃落定，各政黨都部署緊明年立法會選舉，民主黨總幹事林卓廷被視為主席劉慧卿喺新界東嘅接班人。雖然卿姐未明言放棄連任、交棒新人，但剛當選區議員嘅林卓廷就有意更上一層樓，噚日明言會積極尋求黨內及市民支持，出選明年立法會新界東直選。 林卓廷分析，新東派兩條隊出選太進取，唔可行，佢暫未知卿姐心意，所以「若阿姐出來選，我咪喺黨內繼續默默耕耘」。雖然阿廷之前反圍標打響名堂，但佢話黨內民調仍顯示自己知名度「相當低」，同卿姐差距「相當遠」。至於超級區議會，佢就話無意參選，認為黨內有好多人才，自認「未有咁嘅級數」。林卓廷話，無論立法會或黨內事務都好繁重，建議民主黨考慮增設黨魁一職，黨主席亦未必要立會議員擔任，但強調只係初步醞釀階段。唔通阿廷想留條後路鋪路做主席？佢就話自己未夠班，無諗過做主席，但就自爆連港鐵候任主席馬時亨前日見完民主黨後，撞到佢都揶揄「呢個咪未來主席？」喎。
|
| |
| |
