最佳新聞獎 明報奪5冠共15獎

最佳新聞獎明報奪5冠共15獎

[2016.03.16] 發表

【明報專訊】一年一度嘅香港報業公會盛事、「2015年香港最佳新聞獎」結果噚日出爐，《明報》再次大豐收，一共喺10個組別奪得15個獎，包括5個冠軍。其中引起全城關注嘅「長者遭脫光露天等冲涼」報道，更同時奪得「最佳獨家報道」冠軍和「最佳新聞報道」亞軍。

長者「剝光豬」報道奪大獎

每年嘅最佳新聞獎都吸引唔少印刷傳媒嘅優秀作品參賽，報業公會今屆就收到614份合資格參賽作品。明報偵查組嘅「長者遭脫光露天等冲涼」報道勇奪佳績，同事花咗好多時間部署，加埋長時間等候，先影到劍橋護老院職員喺露天將長者剝光豬等冲涼。同事話雖然辛苦，但矢志要揭發社會不公現象，引起到社會迴響，點都值得。

其他包括偵查組「維港泛黃疑遭亂倒廢料」報道，就奪得「最佳新聞報道」季軍；港聞一般組冼韻姬、邱雅錡和袁樂婷，就憑「競爭法系列報道」奪得「最佳經濟新聞報道」亞軍；而中國組記者楊立贇就奪得最佳新人。《星期日生活》同事陳嘉文同李寶瑜，就憑「城市考古系列」攞到「最佳文化藝術新聞報道」冠軍。

攝記奪圖片組雙冠

明報嘅攝記手足今屆亦勇猛非常，共奪得2冠、1季、1優異4個獎，其中鍾林枝同鄧宗弘分別攞咗圖片組(新聞組)冠軍、季軍同優異獎。鍾林枝當日喺東區法院外拍攝前特首曾蔭權提堂，在過百傳媒爭相採訪嘅混亂情况下，影到極富電影感嘅相，真係少啲功力都唔得。而葉家豪亦憑拍下藍天穿咗一個大窿嘅「雨幡洞」現象，奪得圖片組(特寫組)冠軍。Emily恭喜各得獎同事，希望大家繼續有更多好新聞回饋讀者。

更多港聞