【明報專訊】《十年》奪得今屆香港電影金像獎最佳電影，連日嚟爭議不斷，負責電影發展嘅商務及經濟發展局長蘇錦樑難逃畀記者追問睇法。點睇《十年》拎最佳電影？點睇佢引發嘅爭議？電影嘅港獨內容係咪政治不正確？蘇錦樑就多次以未睇《十年》為理由，不作評論，但就話尊重業界決定。 公民黨立法會議員郭家麒噚日喺立法會財委會特別會議追問蘇錦樑，當局有無協助過《十年》製作？能唔能夠爭取更多地方放映？但蘇錦樑無針對《十年》回應，郭家麒就話「我係問你呢套戲」。蘇話電影服務統籌科有向業界提供外景支援，而放映電影係由市場商業機制決定。 有入戲院「捧場」嘅經民聯議員梁美芬曾經話《十年》宣揚港獨，劇情亦有「屈中央」之嫌。梁美芬噚日喺報紙撰文，大談港獨違反國家安全，批評金像獎協會主席爾冬陞喺頒獎禮嘅發言鼓勵咗宣揚港獨嘅電影，仲叫佢反省吓點解《十年》會獲獎，唔好再作「令人啼笑皆非的指控」。
|
| |
| |
