【明報專訊】立法會選舉前嘅母親節，各黨派議員都好忙，分別喺所屬選區向街坊派花應節，接觸一下選民，好似工聯會黃國健除咗派禮品，仲搞頌親恩電影欣賞會。公民黨楊岳橋就賣溫情，喺fb上載一張握着103歲外婆手嘅相片，感激婆婆照顧，「見面不用多言，握一握手，就像小時候她拖著我一樣就夠」。經民聯梁美芬就拍柔情短片，話全職工作母親或家庭主婦同樣值得尊敬。 收越洋果籃 葉劉曬幸福 新民黨葉劉淑儀嘅囡囡留學，今年唔可以陪佢過母親節，但葉太就喺fb曬幸福，話囡囡好有心，越洋訂咗一個果籃送到立法會畀佢。葉太話果籃上面鋪滿朱古力，大概係因為囡囡記得佢喜歡吃，「女兒這份遠渡重洋的心意，吃下去，特別甜在心頭」。 民建聯婦女事務委員會噚日就去咗政府總部請願，要求政府推行鼓勵生育政策，提供有利環境及家庭支援措施以鼓勵生育，提高生育率。佢哋提出包括研究資助輔助生育服務、延長產假及侍產假，以及全面推動及支援母乳餵哺等。 特首梁振英(CY)都出post祝大家母親節快樂，仍換來唔少「嬲嬲」符號，但都有唔少人畀like，包括教育局長吳克儉及多名副局長、政助。有CY支持者就留言：「連母親養大你都嬲，嬲親正衰仔！」
|
| |
| |
;){kind=small}
