【明報專訊】英國駐香港及澳門總領事吳若蘭即將卸任，英方尋日公布，將會由做過駐緬甸大使嘅賀恩德(Andrew Richard Heyn)接手，9月履新。 大使變總領事，聽落好似「降咗呢」，其實唔係。浸大政治及國際關係學系副教授陳家洛解釋，香港係重要嘅大城市，同倫敦有密切關係，從歷史淵源同現况睇，都需要有經驗嘅人壓陣。賀恩德接手呢個重任，唔單止無「燉冬菇」，仲可以算係升職𠻹！ 賀恩德外交經驗豐富，曾經派駐葡萄牙首都里斯本同愛爾蘭首都都柏林，2009年至2013年出任英國駐緬甸大使，時值緬甸巨變，被軟禁民主領袖昂山素姬喺2010年底重獲自由。此後軍政府逐步開放，素姬亦喺1990年以來嘅首次多黨選舉贏得國會議席。賀恩德喺新聞稿話有機會親身感受香港嘅非凡活力，感到榮幸。現任總領事吳若蘭曾拍片用字正腔圓廣東話同港人拜年，又玩facebook live答問題，唔少網民勁like。唔知新任領事會唔會入鄉隨俗，學返兩句廣東話呢？
|
| |
| |
