【明報專訊】新一批議員就嚟會進駐立法會，就嚟卸任嘅人民力量陳偉業(大嚿)就提醒新丁議員，話如果唔想做完一屆就執包袱，不妨參考佢嘅意見。 新一屆有26個新丁議員，大嚿喺Facebook話，「立法會大樓10樓殺氣很重、海邊殺氣大，很危險」，指當日佢搬入10樓寫字樓，有朋友嚟探訪已經話呢度殺氣好大，尤其是望海嗰一邊。結果4年過去，10樓辦公12個議員，其中6個唔係退休就是敗選，遠高於呢一屆平均37%嘅換人比率。佢話如果底子唔係太厚嘅新人最好就唔好揀10樓，尤其是望國金嗰邊嘅辦公室，而1001號房仲係凶中之凶喎。 「出入健身室 議席得個吉」 大嚿又奉勸大家，成日去立法會健身室，議席隨時得個吉，佢翻舊帳話前議員李永達經常出入健身室，結果2012年連任失敗；又話據聞本屆立法會，何秀蘭、李卓人經常出入健身室跑步，范國威亦不時用跑步機，結果3個都連任失敗！ 不過，大嚿都話呢啲趣聞係信不信由你。據Emily所知，其實馬逢國同姚思榮等都有用吓健身室，但兩個都成功連任。
|
| |
| |
