【明報專訊】後日就係單車節，除咗欣賞健兒破風英姿，當日中午舉行嘅總裁慈善單車遊都係焦點，但星光似乎少咗啲。今年參賽者要喺尖沙嘴梳士巴利道、麼地道同科學館道踩兩個圈，全程4.6公里。 Emily率先睇過參賽名單，旅發局總幹事劉鎮漢舊年不慎跣倒，仍然負傷完成賽事，今年捲土重來，相信一定做足準備！ 冠名贊助嘅新鴻基地產，今年就由參加過35公里挑戰組嘅執董黃植榮同董子豪披甲，挑戰第二度出戰總裁賽嘅東亞銀行執董李民斌。其餘參賽者仲有一田百貨署理CEO黃思麗、美國駐港澳副總領事何志(Thomas Hodges)，同匯豐銀行(中國)行長兼CEO廖宜建。 今年總裁賽星光略減，舊年上陣嘅商務及經濟發展局長蘇錦樑、新地主席郭炳聯同海洋公園副主席劉鳴煒，今年都無參賽。不過，比賽最緊要都係為慈善，每個參與嘅總裁都會捐出1.5萬元。
|
| |
| |
