【明報專訊】新一屆立法會議員10月就任，各人早前已分配好位於立法會大樓內嘅辦公室，而慢咇陳志全本身係連任，理論上唔使郁可以留番喺10樓1003室，但慢咇噚日成人之美，同青年新政達成換房協議，讓出自己坐咗4年嘅辦公室。 慢咇話，青政梁頌恆同游蕙禎分配咗1002及1004號房，中間隔咗佢間1003，青政希望佢可以讓出1003，等佢哋可以打通1003同1004房。慢咇話佢嘅同事本來唔想搬，因為搬一搬工程都極大，除咗要大執辦事處文件及家具，電話、電腦、電線甚至信封信紙都要改過。不過，慢咇話，如果佢喺餐廳食飯，見到有情侶隔住位坐，佢都願意讓一讓位畀人哋，所以今之都賣個人情畀青政。 慢咇同職員會搬去1002，即係以前陳偉業間房，而旁邊1001係熱血公民鄭松泰，換言之人民力量會同佢哋關係唔太好嘅熱血公民做鄰居，唔知兩幫人將來會唔會喺大樓裏面擦出火花？
|
| |
| |
