唱亞視歌笑無綫愛照肺 62歲朱咪咪變身學生妹 自爆遭同行看不起
【明報專訊】一連兩場《朱咪咪利利是是演唱會》前晚大年初七於紅館開鑼，朱咪咪繼續以其搞笑風格表演，令全場爆笑之餘，少不免向觀眾𢭃利市，就連上台合唱的兩個兒子、表演嘉賓姜皓文、劉玉翠及李思捷亦狂𢭃利市，要出動「運財童子」跟尾袋利市。朱咪咪又大膽拿無綫開玩笑。而造型方面，除了高貴閃爆的舞衣外，更變身少女學生Look。
記者﹕梁榮達 攝影﹕鍾偉茵
62歲朱咪咪前晚年初七人日在紅館開騷，全場爆滿，演唱會由連串炮仗巨響聲揭開序幕，朱咪咪穿上閃爆珠片Deep V裙獻唱《白金升降機》，唱罷跟觀眾拜年，適逢前晚人日，朱咪咪大唱生日歌。她說﹕「新的一年希望人人有工開，晚晚有覺瞓，瞓得係福氣，睇完騷開開心心返去瞓個好覺，精神爽利。」
帶醒獅狂𢭃利市
其後朱咪咪換上紅裙出場，笑言似利市封有節日氣氛，台上還有4隻醒獅舞動，十分熱鬧。朱咪咪帶着4隻醒獅向台下觀眾拜年，有個「運財童子」拿着大袋跟着朱咪咪𢭃利是。當她𢭃完利市準備返回舞台，又折返𢭃奶奶的利市，她說﹕「我奶奶封利市唔可以唔攞，萬一佢叫個仔休咗我咪死！」令全場爆笑。
「未見過有魚尾紋少女？」
62歲的朱咪咪以少女學生Look出場大唱兒歌，跳到喘氣時笑問舞蹈員﹕「未見過咁靚嘅少女？未見過有魚尾紋少女？真係無氣喇。」又將《IQ博士》歌詞改成「豬乸」、「豬扒」，掀起全場高潮。朱咪咪笑指這身學生Look是當年求學時的校服。她其後笑指見到台下觀眾對她的學生Look造型睇到嘔血。
再大歌手都是開4面台
朱咪咪表示今次是她最後一次在紅館開騷，她說﹕「有記者問我唔唱歌是否有大病，我睬過你！其實每次做騷都要落手落腳去做，都好辛苦，唔再做是想我下半生舒服一點。好感激全場觀眾對我不離不棄，我本身無簽大公司，無大後台又無靠山，我只簽了TVB，我知道有同行睇唔起我，話不是大公司製作，但對我都不重要，最重要令大家開開心心，老實講，大與細有什麼分別，再大的歌手都是開4面台，開不到6面台。」
3母子合唱《海闊天空》
其後朱咪咪兩個兒子手持鮮花上台，她問兒子﹕「啲花是否從後台花籃偷來？」兩個仔點頭，朱咪咪搞笑以「兩個乞兒仔」形容他們。朱咪咪與兩個仔合唱《海闊天空》，指他們無興趣加入娛樂圈，同樣沒有演藝天分，叫大家不用寄予厚望，今次唱歌就得到證實。她又爆大仔今年將會結婚，年底榮升做奶奶級。
演唱會嘉賓有姜皓文、劉玉翠及李思捷。朱咪咪介紹亞視舊將姜皓文出場時說﹕「今晚是冒險請你來，因你是隔籬台。」說罷即與姜皓文鬥唱《IQ成熟時》、《秦始皇》、《天蠶變》及《大地恩情》等亞視劇集主題曲。朱咪咪突然拿起電話扮嘢收到無綫高層來電，她抵死對着電話說﹕「喂，邊個？叫我落台？剛剛開騷……係，多謝提點，知道點做，拜拜！」收線後即向姜皓文表示快啲轉台，要唱回自己電視台的歌，否則要上去照肺，因為公司很喜歡幫人照肺。姜皓文搞笑話TVB醫療福利好好。之後兩人選唱TVB劇集主題曲《難為正邪定分界》。
姜皓文﹕TVB醫療福利好
輪到劉玉翠出場時，穿上透視裝的劉玉翠慘被朱咪咪取笑：「你都冇乜肉，換轉我著呢件衫一定好睇過你，無事業線就唔好縫條落去啦。」令劉玉翠難以招架。
■更多娛樂猛料 ﹕ol.mingpao.com
