【明報專訊】公民黨立法會議員楊岳橋(AY)身為黨魁兼執業大律師，加上背後有班醒目政治助理幫手吸人氣，唔少粉絲視AY係男神。今年初，AY宣布向女友求婚成功，曾經有網民講笑話「心碎了」。𠵱家有個「更心碎」嘅消息，就係AY「封盤」啦，佢趁立法會休會，低調同女友去咗丹麥註冊！ 譚文豪：一年抱兩指日可待 AY嘅辦事處facebook專頁「810扮工室」噚日下午突然宣布「老細結婚了」，仲貼咗楊生楊太合照，宣布佢兩個已經註冊啦。黨友譚文豪就立即去AY嘅立法會辦事處「加持」，貼一對龍鳳B玉照，祝願楊生楊太「一年抱兩指日可待」。公民黨一向旺丁，譚文豪有一對龍鳳B、前議員陳家洛就有4女1子，「810扮工室」喺譚文豪fb留言話，「 一隊籃球隊，仔定女就睇下老細自己鍾意啦」。有好多網民留言祝福一對新人，仲有留言話「男神結婚了，新娘不是娥(陳玉娥)」。 楊岳橋年初自爆喺挪威求婚成功時，政界中人已議論紛紛。AY一向低調，只透露過會在年底拉埋天窗。Emily聽聞，楊生楊太年底只會低調邀請親朋出席婚宴，唔會鋪張大搞。
|
| |
| |
;){kind=small}
