【明報專訊】旅發局噚日公布9月訪港旅客數字，共約464萬人次訪港，比去年同期上升4.8%，其中約209萬人次屬過夜旅客，比去年同期上升咗2.7%。旅客仍然以內地客為主，9月就約有357萬人次訪港，上升7.2%。旅遊界立法會議員姚思榮話，今年無咩「驅蝗行動」、反水貨客等嘅負面消息，相信內地客已經陸續恢復信心，預料旅遊業成績愈來愈好。 眾多市場中，以新市場(即印度、沙特阿拉伯、俄羅斯等地區)跌幅最犀利，9月約有4.3萬人次訪港，比去年同期跌咗9.5%。姚思榮話，今年入境處為防有人來港申請免遣返聲請而實施咗新措施，印度旅客需要預先上網登記經審批先可以來港，所以都令唔少印度客卻步，而入境處亦見到措施有成效，相信未來都難取消相關申請制度。
|
| |
| |
