【明報專訊】剛剛喺10月結婚嘅公務員事務局前局長張雲正(左)，原來係港島聖類斯中學校友。適逢今年係該校90周年校慶，佢之前返咗母校接受訪問，大談讀書時嘅經歷，仲透露離開官場嘅原因，係要照顧95歲嘅媽媽(右)，佢話呢個決定係「明智、理性、反映內心所想」。 1978年畢業嘅張雲正，細細個住喺香港仔，小三插班讀聖類斯，一路讀到中五。佢最難忘係爸爸喺佢14歲時癌症過身，當時係由學校神父捉住佢雙手通知佢呢個消息，神父嘅關懷，佢到𠵱家仲記得。張雲正又透露自己細個好鍾意打機，成日流連深水埗黃金商場，連之後到英國讀大學都係揀讀電腦，諗住畢業後可以寫電腦遊戲。 今屆政府埋班時，曾經有傳特首林鄭月娥搵過張雲正做政務司長，最終唔成事。張雲正就解釋，佢選擇離開官場係要照顧年老嘅媽媽，因為好難得媽媽95歲都仲好健康，「我問自己，未來五年，究竟係我媽媽嘅五年珍貴啲，定我自己五年珍貴啲？」佢又話退休後要陪媽媽去旅行，搵工人照顧佢，同埋盡快成家立室，因為媽媽怕個仔老咗無人照顧，睇嚟張雲正真係好孝順。 (聖類斯中學90周年紀念特刊撮圖)
|
| |
| |
;){kind=small}
