【明報專訊】公民黨黨魁楊岳橋(AY)早排同女友Eve 喺歐洲註冊結婚，噚日傍晚佢就喺立法會附近搞咗個小型party，邀請泛民、建制派議員同傳媒朋友一齊開心吓。雖然近排立法會日日都火藥味濃，泛民、建制派就修改議事規則舌戰不斷，泛民前日仲衝擊議會，不過無礙大家輕鬆祝賀AY，唔少建制派都人到禮到。 雖然Party 舉行期間，立法會舉行緊財會，但議員都有分批到場祝賀，立法會主席梁君彥、建制派班長廖長江、民建聯主席李慧琼同黨友劉國勳葛珮帆等、經民聯主席盧偉國黨友石禮謙梁美芬等、新民黨主席葉劉淑儀、無黨派議員謝偉俊、醫學界陳沛然，以至泛民議員胡志偉、黃碧雲、鄭松泰、莫乃光、梁繼昌等噚日先後嚟到。AY呢場Party 非常簡單，有個寫咗佢同太太英文名嘅背景畀大家影相，上面就畫咗「橄欖枝」，唔知對議會嘅緊張關係有無特別寓意呢？ 政見雖然唔同，但似乎泛民、建制派都有共同「訴求」，好似手持一紮鮮花、帶領黨友一齊到場嘅盧偉國，噚日同黨友齊聲祝AY及楊太「三年抱兩、打孖上」；泛民嘅陳志全、郭家麒、尹兆堅等，同一對新人合照時，亦嗌晒口號祝AY三年抱兩。不過呢句訴求就唔知會唔會咁快「成功爭取」喇，楊太同Emily講，暫時唔傾向生小朋友，但都唔係抗拒嘅。
|
| |
| |
;){kind=small}
;){kind=small}
