【明報專訊】高鐵香港段通車至今超過半年，唔少旅客都到訪過高鐵西九龍站。內地媒體《南方都市報》聯同南都大數據研究院，今年1月頭實地測試大灣區入面10個高鐵站嘅設施同服務，當日測試小組兵分五路，由廣州南站出發坐高鐵、城際動車等，去呢10個站，並按站內設施、票務、服務態度、配套服務及網上系統五大指標去評分，總分100。 測試結果發現，西九龍站以96.72分排名榜首，遙遙領先排名第二、總分81.5分嘅廣州南站，其中西九龍站喺站內設施、配套服務都拎到滿分。至於排第三嘅就係深圳北站，總分80.68。 最抵讚係服務態度 南都評分話，除咗站內設施之外，西九龍站最值得稱讚嘅係工作人員服務態度，以及指引準確度兩方面，仲話車站職員「主動、熱情為乘客解答和帶路」。不過，值得留意嘅係，今次評分係喺1月做嘅，當時西九龍站仲未發生「炒人風波」，唔知西九龍站200個外判員工被解僱之後，服務仲可唔可以保持到呢個水平呢？
|
| |
| |
