【Emily】話雪卵等要廿萬太貴 林琳促政府增支援
[2023.05.18] 發表
【明報專訊】民建聯議員葛珮帆噚日喺立法會大會提出口頭質詢，促請政府加強輔助生育服務，包括研究提供中央冷凍卵子服務。其黨友、正在懷孕嘅林琳就個人經驗反映意見，話自己亦係早前雪卵之後再受孕，仲話各項配套加上手術要花費20多萬元，認為後生啲嘅都無經濟能力負擔，冀政府加強支援。醫務衛生局長盧寵茂就話，生兒育女係重要嘅家庭決定，政府唔應該直接干預，重申公私營醫療機構現在均提供一系列輔助生育服務。
醫衛局：政府不應干預家庭決定
葛珮帆口頭質詢政府會唔會推出各項措施協助婦女生育，包括提供育兒補貼、增加幼兒託管服務、提供中央冷凍卵子服務、增加公營醫療嘅試管嬰兒或生育評估門診服務等。盧寵茂話會推行各種家庭友善措施，締造有利生育嘅環境，但暫時無計劃就輔助生育服務推行公私營協作。
新民黨陳家珮就指出，現時儲卵期僅10年，「25歲雪卵，38歲結婚已經無咗」，期望政府審視儲存期限。林琳亦認為，唔少婦女年過30備孕時先發現身體唔適合懷孕，惟人工受孕成本高，冀政府增加支援並將儲卵期延至30年。盧寵茂會上指決定儲卵期需考慮多項因素，如有需要會檢討。
更多港聞
【Emily】私隱署短片賽 田家炳生「打機泄資料」奪冠
【明報專訊】私隱專員公署早前舉辦「尊重私隱由我做起」小學生短片創作比賽，日前舉行頒獎禮，冠軍由仁愛堂田家炳小學嘅隊伍奪得，共有23隊參賽隊伍... 詳情
【明報專訊】近日Emily身邊好多朋友感染新冠病毒，醫衛局長盧寵茂噚日朝早出席「亞洲醫療健康高峰論壇」致辭時聲沙沙，佢主動提起過去兩日公務繁...
詳情
【明報專訊】政府推出咗「共創明『Teen』計劃」，為基層初中生配對友師。經民聯選委界別議員陸瀚民噚日喺立法會話，計劃只為期一年，不足以解決跨...
詳情
相關新聞
