【娛樂場】周星馳比高娛樂首名歌手 RIIANA推處女作《I'M SORRY》

[2025.07.29] 發表

【明報專訊】唱作女新人RIIANA成為周星馳旗下公司比高娛樂首名歌手，8月1日推出處女派台歌《I'M SORRY》，在各大音樂平台上架。香港土生土長的RIIANA，4年前隻身到北京現代音樂學院修讀聲樂，「喺北京修讀期間，立志做唱作人，狂寄demo去唔同唱片公司、節目面試，咁啱Fireverse Music招募音樂人，好幸運得到引薦，輾轉啲歌去到『比高娛樂』的決策人手上，跟住簽約成為旗下歌手」。

欣賞Gareth.T 恨合作

RIIANA表示對正式出道未感壓力，「反而覺得公司對住我會有壓力，啱啱入嚟就要出歌，自己諗法比較多，有時難免令大家工作量增加，試過同經理人傾到凌晨5點，好多謝公司團隊，因為我的歌終於要面對大眾，要將最真誠的內心世界公諸於世，擔心做得未夠好，這才是我的壓力來源」。

RIIANA透露計劃今年推出3首唱作新歌，未來會以自己創作的音樂為主，期待可以推出個人創作大碟。問到最欣賞哪名本地創作歌手？RIIANA說：「近來留意到創作歌手Gareth.T(湯令山)，如果有機會都想一齊創作，因為未來計劃創作廣東歌，也希望跟樂壇創作人合作。」

新歌《I'M SORRY》走R&B曲風，RIIANA承認R&B非她最擅長的類型，經過近10個月的調整，兩次補錄才有現在的版本，「呢三四年已經儲埋好多歌，呢首係我第一首作品，對我意義好大，寫嗰陣大概22歲，producer都覺得最啱我，好有心機指導我歌詞要點寫，記得老師知我的歌行這種曲風好錯愕：『唔係吓話？你唱唔好亦都唱唔到㗎喎！』不過我好堅持要做唱作人，所以佢都好有耐性教我，先有𠵱家嘅效果，所以我真係好多謝佢哋」。

獲安排嘗試電影配樂

RIIANA透露新歌內容刻意營造慵懶又有點反叛、輕佻的感覺唱「道歉歌」，「我就係想有呢種反差」。歌曲描述一直處於情感上風，被另一半寵愛、包容的少女，不太懂得理會對方的感受，即使做錯也從不主動低頭，直至對方終於要離開才醒覺自己的錯，然後主動道歉想挽回，但又不相信對方會離開自己。

比高娛樂還有發展電影等相關業務，RIIANA稱公司有安排她嘗試製作電影配樂，不時將自己創作的歌send給公司，「係好好嘅機會，同埋我創作完都會喺公司group問大家意見，成個團隊都畀好大自由度我，證明入呢間公司係啱嘅，因為我嘅創作只有一個宗旨，就係『只要我鍾意就會去試』」。