【Emily】旅發局孖日本旅社推大熊貓慶生遊港團
[2025.08.04] 發表
【明報專訊】下星期五(15日)係港產大熊貓龍鳳胎家姐「加加」同細佬「得得」1歲生日，佢哋出世後已吸引到各地旅客慕名而嚟探訪，旅發局聯同日本旅行社近日舉辦「大熊貓慶生遊港」4日3夜之旅，團友噚日去咗海洋公園為龍鳳胎提早慶生，佢哋仲送上自製生日卡，祝願家姐細佬快高長大、健康平安。旅發局話月尾會安排另一批日本熊貓粉絲來港賀寶寶生日。
旅行團噚日朝喺海洋公園開放前率先入園，享受同龍鳳胎嘅專屬見面時段，佢哋不論男女老幼都被龍鳳胎嘅可愛動態融化，亦去埋探訪另外4隻大熊貓。首次訪港嘅米山小姐話一直好鍾意大熊貓，所以報名參加呢團，形容龍鳳胎特別可愛；佢話前晚去咗睇維港夜景，今日就會去食熊貓主題套餐，打算行吓街同享受香港美食，仲話將來會再嚟。
另外，全港32條街道本月會陸續換上大熊貓主題路牌，首階段有9條街道率先換牌，包括海洋公園道、皇后大道中、火龍徑同廟街等旅遊熱點，一眾熊貓迷可以「集郵」打卡。
另外，旅發局首次與生於香港嘅「LABUBU之父」、藝術家龍家昇合作，設計出大熊貓生日特別版LABUBU，並邀請影星楊紫瓊等星級名人，喺社交平台分享同特別版LABUBU嘅開心時刻。
更多港聞
【Emily】全民運動日 李家超江旻憓玩虛擬擊劍
【明報專訊】噚日係「全民運動日」，雖然朝早一度黃雨，公眾泳池未如往年人頭湧湧，但唔少市民仍去咗各區體育館使用免費開放嘅康樂設施、參加免費康體... 詳情
【Emily】同學仔訪律師會 湯文龍：AI不會取代律師
【明報專訊】人工智能（AI）已深入各行各業，律師會會長湯文龍（Roden）前日見一批學生時話，人工智能既帶嚟機遇亦帶來挑戰，「人工智能不會取... 詳情相關新聞
