【Emily】副刑檢專員放長假做實習大狀 「師父」係陳馮富珍子 聽聞無意離開律政司
[2025.09.06] 發表
【明報專訊】律政司副刑事檢控專員周天行(Anthony，圖)近年處理多宗國家安全案件，包括啱啱完成結案陳辭等出判辭嘅壹傳媒創辦人黎智英案。Emily留意到，根據政府電話簿，Anthony由今個月1號起休假到11月30號，足足3個月，因咩事要「充電」咁耐？
原來佢唔係放低法庭工作，Emily聽聞，Anthony係去跟「師父」學師，做實習大律師3個月。據悉，做開刑事檢控嘅佢會跟擅打商業案嘅資深大律師陳浩淇，做3個月民事工作，「師父」咁啱英文名都係Anthony，亦都係世衛前總幹事陳馮富珍阿仔。
至於學師後係唔係意味佢可能離開律政司呢？Emily聽聞佢無意離開律政司。律政司發言人證實，周天行正展開實習大律師嘅3個月培訓，但無進一步評論。
Anthony初時以事務律師資格加入律政司。由於律政司同私人市場唔同，律政人員無分事務律師或大律師，都會參與檢控同出庭，分別係事務律師無戴假髮出庭。律政司檢控科目前無資深大律師，2021年律政司修例，律政人員都可以做資深大律師，當時已有人觀望周天行會唔會有機會「受惠」。
更多港聞
【Emily】丘應樺訪抗戰遺址 懷緬阿爺丘逢甲遺志
【明報專訊】多名司局長近日先後到訪香港嘅抗戰遺址，其中商經局長丘應樺去到沙頭角抗戰紀念館同烏蛟騰抗日英烈紀念碑，令佢諗起爺爺丘逢甲嘅抗日事迹... 詳情
相關新聞
