【明報專訊】公關提醒民陣英文名 監警會新主席郭琳廣上任後，噚日第一次主持該會記者會，講吓七一遊行嘅觀察。不過，郭主席可能係新到任，似乎唔多「熟書」，有英文傳媒問到今年民陣公布嘅七一遊行人數時，郭琳廣細細聲問坐喺隔籬嘅副秘書長梅達明，係唔係「three hundred thousand(30萬)」，梅sir就答係51萬；提及民陣時，佢又講錯咗佢哋個名做「Civil Human Rights Forum」，要在旁公關糾正後，先改番做Civil Human Rights Front。 郭琳廣噚日開記招前，有攝影行家話郭拍埋梅sir坐，高度有明顯距離，郭主席想校高張櫈，但又發現校唔到，要勞煩幾個人幫佢搵張高啲嘅櫈，場面一時間都幾尷尬。記者會期間好多提問郭都無答，拋畀梅sir答。行家諗住問吓兩個月前嘅七一遊行觀察，郭琳廣就話要聽埋警方解釋先，唔肯評論。 唔夠資料唔評論 對於爭議議題，例如七一遊行後有5名民陣成員被捕，郭主席話因為喺傳媒所得資料唔夠全面，唔評論住，搞到一班行家唔知點好。有行家認為，如果主席下次開記招前，喺呢啲已經係兩個月前嘅議題多做準備，相信無論外界及傳媒都會覺得監警會運作順暢同埋有效率啲。
|
| |
| |
;){kind=small}
